Enrik MEHMETI
Për dy rastet e fundit të skeletëve të gjetur, rastin e kokës në fshatin Armen ku më pas u gjet dhe një pjesë e trupit jo larg vendit ku u gjet koka, si dhe ajo e skeletit të gjetur në fshatin Zvërnec, nuk ka ende një identitet. Më shumë shpresa për identifikim ka rasti i fundit, ku skeleti i një personi është gjetur në buzë të detit, ka një dyshim se i përket një të riu rreth 30 vjeç nga një fshat i Vlorës nisur kjo nga veshja që kishte në trup, xhupi blu, xhinset, këpucët si dhe rripi ku togza e tij është identifikuar nga të afërmit e personit të zhdukur. Do të jetë ADN-ja ajo që do të japë përgjigjen përfundimtare.
Ndryshe nga skeleti i Vllahinës ku në kafkë kishte një vrimë duke çuar në një dyshim për një ekzekutim, tek skeleti i Zvërrnecit nuk është identifikuar asnjë shenjë e tillë, por gjithsesi një prej pistave të dyshuara është ajo e një vrasjeje të mundëshme, por nuk përjashtohet ajo e një vdekje natyrale. Përsa i përket skeletit në fshatin Armen, pas dyshimeve se mund të bëhej fjalë për një 45 vjeçar të zhdukur vitin e kaluar dhe pas ballafaqimit me dentistin e tij dhe dhëmbët nuk korespondinin pasi i zhdukuri kishte proteza dhe lart po ashtu dhe në pjesën e poshtme, ndërsa koka e gjetur kishte mungesë të dhëmbëve vetëm në pjesën e sipërme, nuk ka pasur asnjë dyshim tjetër konkret. Pavarësisht dyshimeve për identitetin e rasteve, deri tani nuk ka asnjë përgjigje zyrtare se për kë persona të zhdukur mund të bëhet fjalë.
